唔好意思,直到現在才有空寫評價。
設施點解我畀咁低分,主要我發覺我入住嘅房間,太多裝飾物品爛。
雖然這些物品對我入住嘅情況沒有影響,譬如有個擺設公仔爛,櫈皮表面有啲爛,個牆有啲鑽窿,牆角有撼崩咗,仲有個櫃裏面啲架全部爛嘅,咁其實呢啲對我入住用途係冇影響,因為我用唔到。
不過好得意我入住間房裏面都有個公仔, 有啲**嘅感覺,如果當晚喺間房度睇埋個鬼公仔電影,再望到個公仔你會有好多片段出嚟啦。
而且個公仔呢,有少少毛髮,唔知咩毛髮!好核突,唔敢掂。
我繼續由佢,放在個衣櫃裏面,另外衣櫃裏面有一隻門,我用咗九牛二虎之力推唔到,叫老公又推唔到。
呢啲問題都已經向服務員反映,他們說冇所謂呀,知了,係咁㗎喇,唔使理。
咁我咪冇理,照住返嗰間房,最鍾意房裏面有個二合一洗衣機喎,個洗衣機連埋乾衣機真的好方便,又提供埋洗衣液畀你。
老公話以後去旅行,一定要有呢啲二合一洗衣機,起碼唔使帶咁多衫,淨係著一套去,同埋帶多套瞓覺就得㗎喇。咁日頭check in完之後,週圍行街,行完街返嚟污糟邋遢,套衫就掉去洗得喇,著套瞓覺就瞓覺。
第二日又有乾淨衫著,瞓覺嗰套又掉去洗,夜晚返嚟又又乾淨喇。
個行李喼都冇咩放,淨係帶啲拖板,不過呢佢呢度雖然有借一個火牛畀你,但係只得一個窿位咋,我只能叉一部電話,平板呀其他嗰啲全部都叉唔到,最衰自己唔記得帶個內地拖板,淨係記得帶個旅行水壺和毛巾。
公寓毛巾睇過係好軟熟,同埋好乾淨。因為我習慣自備毛巾,所以都冇用佢哋嘅。
我個房裏面就有一啲一次性用品。
例如,紙拖鞋就唔係淨係得紙嗰隻,叫做中上囉。洗手間裏面另外又有可循環用嘅拖鞋。亦都有牙刷。鬚刨。有支洗頭水同一支沐浴露。有梳。
但留意沖涼嗰個熱水呢!會寫住個溫度,當你煲到67度嗰陣時,你就可以去沖喇。因為其實好快凍,沖到15分鐘之後,佢得返廿幾度咋,就覺得好凍呀啲水,接住第二個沖,就要等佢再煲返去60幾度先沖得。總括嚟講,熱水唔夠沖,唔可以盡情咁慢慢沖。
要盡快咁沖,比較沖得唔夠過癮,唔夠舒暢和開懷。
服務呢兩個服務員都是男生,都好好。
我入住遇到嘅是兩個男生, 都好好呀。
你入住嗰陣時,佢會要求你加微信,入住其有乜嘢,直接微信佢,你想要換毛巾倒垃圾或者要插頭要啲乜嘢,佢哋都好快就上嚟同你服務呀。
有個小插曲,有一曰我入住嘅樓層,想出間時,聽到門口啲人好嘈,又話斬你,又鬧交。嚇到我哋唔敢離開房間,咁就微信同個職員講。
佢回我們話唔係佢哋客人嚟, 嘩!咁勁嘅?
你上都未上到嚟睇!就知道唔係你哋客人?
好明顯這個樓層常常會發生這啲事?同埋全層係咪得我入住嗰間房先屬於這間公寓嘅呢?如果唔係點解肯定唔係佢哋嘅客人呢 ?
咁我話有冇保安呀?你可唔可以請保安上嚟睇下發生咩事呀!如果唔係我都出唔到去,好驚呀!
後尾個職員自己親身上嚟睇,話冇曬事呀,咁我先敢出去咋。
不過覺得好得意呀,我以為全層都係同一個公寓,原來一層裏面可能得幾間房,得兩間先係屬於個公寓,其他嗰啲係應該自己買房,又或者同其他業主租嘅我估囉。
我哋有好多垃圾,因為我成日嗌外賣,垃圾就咁放門口得啦,定期有清潔人員巡邏樓層,會收起垃圾,但我冇見過佢哋。
雖然我住咗兩晚,但係我冇要求清潔房間,反正係住兩晚唔需要清潔,毛巾我自己自備都冇嘢需。
行去東門九龍城廣場,又或者係檸檬街,可以講話唔遠,又可以講話遠。我行就要半個鐘到去到。
附近就有一個大型嘅廚房烘焙用品商場,不過冇乜嘢睇。
因為係公寓,所以如果你未有門卡嘅話,就要喺樓下 登記咗,然後保安就畀你進入,你上到15樓就辦你入住就得。
其實個保安都唔使我哋登記,佢見我哋拎住行李,問我哋係咪住公寓呀?訂咗房未?我話我哋有入住憑證, 使唔使畀你睇?佢話唔使喇,得喇,入得喇。
我話唔該,都好方便喎。
佢又信我哋呀,見我哋拎住行李掛。
而且我每次出出入入,保安見到我,都同我哋敬禮,好似我哋係高官咁,好有光榮。
退房交鎖匙都好方便我就咁擺喺房裏面就得喇閂埋對門走 我將條鎖匙,就咁放喺房裏面影相,微信話畀佢知我走喇,咁佢話得喇,又唔使查房。