熊本六日遊：熊本城、熊本屋台村、島原城、城趣園、熊本動植物園、阿蘇草千里。

D1:飛機行程,下晝5點幾抵達熊本機場,搭巴士去通町筋(可以用信用卡拍卡,仲可以一張卡畀幾個人嘅車錢),跟住去酒店check in,然後去熊本屋台村食晚餐。極力推介!屋台村平日去冇咩人,假日就人頭湧湧,入面仲有投幣式清酒,100日圓可以飲一細杯。 D2:行路去熊本城,參觀咗一個上晝之後,去隔離嘅城彩苑、櫻之小路食晏(試吓菅乃屋嘅馬肉)。下晝行去櫻町,買藥妝、手信。晚餐食勝烈亭。(超級推介!!) D3:搭路面電車去櫻町巴士總站,星期六頭班車去熊本港係7:34,然後喺熊本港有兩種渡輪可以揀,一班係一個鐘頭去到島原,價錢平啲,一班係30分鐘就到,價錢貴少少。到咗島原港之後,搭電車去「島原」(上車先攞整理券,落車嗰陣將車飛同錢交畀車長),一落車就見到島原城。晏晝喺島原城食碗烏冬,行路去浸足湯(免費,而且水溫好夠!!然後我一個人包場!)浸完之後再行去「坑渠養鯉魚」嘅地方參觀。最後行去最近嘅電車站(體育館之類),到咗島原港之後再搭渡輪返熊本港,再搭巴士返櫻町巴士總站。晚餐食黑亭拉麵(蒜頭焦香嘅拉麵),夜啲再去熊本屋台村玩多轉投幣式清酒。 D4:搭路面電車去城趣園(好值得行嘅日式庭園造景,鍾意影相嘅應該可以行兩個鐘,我大約行咗一個鐘),下晝再搭路面電車去動植物園,行路去門口(有一小段距離),索柏嘅銅像就喺門口。(呢個動物園好好行,入場費唔貴)。夜晚搭電車返酒店,喺附近搵間燒肉店食和牛! D5:搭路面電車去水前寺站,轉JR(直接撳機買飛,買到阿蘇),雖然張飛係買到阿蘇,但去到肥後大津呢個站要轉車,然後就一路去到阿蘇(有趣嘅係去到「立野」嗰陣,鐵道呈「之」字形,你會見到車長前後行來行去換方向揸車),一到阿蘇,烏索普嘅銅像就喺門口。巴士站就喺出阿蘇車站右手邊,買一日券巴士飛2000日圓(單程係1000日圓,所以來回都係2000,但買一日券就可以喺草千里、火山總站呢條線無限次搭)。我上去嗰日狂風暴雨,冇草千里,淨係得霧千里。到草千里站,有三間餐廳,我叫咗赤牛丼飯,食飽,見到啲雨都唔會停,就搭車落山。下晝去附近嘅動物園(我係喺阿蘇站搭的士去,但行路返嚟,因為回程嗰陣搵唔到的士。呢間動物園張飛幾貴) 晚餐喺名叫「xxx寫真館」食赤牛丼(一開始以為係影相嘅地方XD,赤牛丼極力推介!!好食過我喺山上嗰間)。食飽之後Lawson就喺對面,買清酒、送酒小食返酒店摸杯底。 D6:食完早餐,搭電車返肥後大津,出南口站,行500米左右同卓洛銅像影相,然後喺車站附近一個商場食飯(地下嗰層好似惠康、百佳,二樓賣衫褲文具),返到肥後大津南口,就可以好容易發現去機場嘅8人座小巴,7月1號起每人收費200日圓,售票機就喺等車處嘅對面,呢種車每半個鐘一班,都算好排。去到機場之後,上機,結束旅程。