抵食唔使收服務費而且又好服務嘅自助餐！

地址－香港油麻地窩打老道街23號 成景國際City Cafe 特色－性價比極高 人均價格－$528 評分－8/10 呢一間餐廳嘅環境相對其他酒店自助餐餐廳較為細，所以佢啲食物種類都冇其他自助餐餐廳咁多，不過大部份酒店自助餐有嘅嘢，例如刺身，羊架,凍海鮮等等，仲有埋生蠔添！😆 講吓啲食物先，入座之後，每人會有一份半隻嘅芝士焗波士頓龍蝦，裏面仲放咗一啲切碎咗嘅菌類增加口感，雖然就咁睇相見到佢有好多芝士，但係芝士味其實就唔算太重，不過味道都唔錯嘅。 其他食物分別有羊架，扇貝，紅酒炆牛腱，芝士焗蠔壽司等等，大部份都係正常發揮，扇貝就比較鞋少少。刺身方面有三文魚，吞拿魚，希靈魚，帶子等等，除咗吞拿魚之外其他都正常，吞拿魚唔建議大家拎嚟食🥶唔知點解佢啲口感好奇怪同平時食開嘅唔一樣，我食咗一半就冇得到 。 呢個價位嘅價錢食自助餐有生蠔可以話係相當難得嘅，佢呢一隻生蠔都有啲蠔嘅鮮味，海水味就唔太重，由於個人鍾意食有海水味嘅，所以呢隻我就唔太好啦😂但係佢嘅味道都唔錯嘅！ 喺呢一餐裏面，我認為質素最好嘅係佢嘅即炸天婦羅，長期有一位員工喺度不停炸，每件天婦羅出嚟都係熱辣辣，炸粉亦都唔會太厚；另外就係煎鵝肝，佢塊鵝肝煎得好香，最重要嘅係佢都係有一位員工長期喺度煎，都係熱辣辣咁食😆 最後就喺到甜品啦！款式相對都算幾多，大致上嘅水準都唔錯，不過個士多啤梨抹茶蛋糕就失色咗啲，比較乾身，其他都唔錯，雪糕亦有唔同味道可以選擇，大家可以學我將雪糕筒窩夫一齊食😆 總括呢間餐廳平日$528免加一，有鵝肝有生蠔有羊架，仲有麵包蟹等等，啲食材都唔算太廉價，服務員都有不停嚟幫我哋加水，仲有紅酒白酒啤酒任飲，性價比真係幾高，如果你去食嘅日子係你嘅生日前後兩日左右，佢仲會送多你半磅蛋糕添，不過記得呢個要提前預訂！呢個係唔錯嘅晚餐體驗！ 以上只係我個人嘅見解同埋感受，大家如果有唔同嘅意見都可以留言傾吓㗎！ #酒店 #香港 #香港餐廳 #自助餐 #城景國際