岩手縣黑毛和牛炭燒盛宴

創意炭燒料理餐廳「焰 」🔥 我哋揀咗Dinner Set B ($980 p.p. )，師傅會席前料理，可以欣賞到師傅技藝及互相交流。牛肉都會選用岩手縣黑毛和牛，肉味同肉質都有一定保證！ 紫蘇二重燒牛肉卷 呢個牛肉卷材料豐富，一啖有齊和牛他他、炭燒牛小排及紫蘇漬物！牛肉肉味香濃，帶淡淡紫蘇葉香。 炭薰牛舌芯 師傅燒香牛舌芯後，直接將成舊炭放上牛舌表面，再薰香一陣。原來咁樣做可以大大增加炭火香！牛舌芯口感好彈牙，有梅子鹽、綠茶鹽、wasabi、芥末醬四款配搭，各有特色。 A5 黑毛和牛酒香壽喜燒 A5 黑毛和牛係牛中極品，油脂密佈，師傅燒烤嘅時候再加入白蘭地。唔單止有火焰效果，視覺效果滿分，牛肉仲有酒香，正！配菜有娃娃菜、豆腐、芋絲、冬菇及南瓜，配甜甜嘅壽喜燒汁，好快清晒！ A5 黑毛和牛粒 和牛肉質juicy ，入口即溶，師傅再刨上鹹香嘅烏魚子係牛肉上面，味道更有層次！ 慢煮安格斯封門柳飯 / 梅子冷素面 強烈推薦慢煮安格斯封門柳飯，份量實在太慷慨！賣相仲好靚！封門柳肉質軟腍，邊邊位燒至焦香，牛魔王必食😂 甜品 甜品都好豐富呀！有兩款選擇，我揀咗日本蜜瓜配上開心果雪糕，日本蜜瓜香甜多汁，手工雪糕味道濃郁，好滿足嘅一餐！