法魯機加酒自由行 - 旅遊套票優惠

去旅行多數貪新鮮間間餐廳去試下，但留Faro兩日去左呢間好有歷史既Cidade Velha食左兩次飯，因為對服務，食物質量同合理的價格感到非常滿意。唔係快餐店既平，但是質量/成本比非常好。 兩日都坐露天位，有太陽但非暴晒，無蚊無烏蠅。第一日飲左杯house white, 食左小多士，重頭戲Cataplana式炆八爪魚。平時都係燒，或炆飯或沙律；呢個係銅鑊仔上,入面有番薯，蝦，蜆，番茄同大量香菜。好好食，八爪魚好軟熟同入面，可能係好新鮮既原因。不過呢個主菜平時一定要二人先叫，一個人去可以request 下。 第二日食半打海水味濃郁Faro生蠔，八爪魚沙律，魚湯，同萍果批。飲無酒精啤酒。Octopus salad ok, 魚湯超級好飲，唔腥但魚味濃。萍果批肉桂味太濃，呢個麻麻地。 Staff好體貼殷勤，亦唔會特別叫你比貼土，但我第二日真心認為好所以有比。埋單每餐都係三十二歐左右，其實好抵食。

地址～Faro Municipal Market Largo Dr. Francisco Sa Carneiro, 8000-151 Faro, Portugal Best Western 酒店職員Claudia 介紹左D景點我大部份都有去。其中傾起街市，大家都理念相同，由街市去了解一個城市。之前係 Porto 行既只係熟食市場，Lisbon 只係行超市，Sintra撞啱公休，所以到左Faro先真正行到街市。 街市十分寬敞，似商場多過似街市，有 cafe有熟食有戶外茶座，仲有補鞋改衫。上一層係一D社區機構，落一層係大型超市。完完全全為民眾而設既聚腳點，亦見好多耆英係度見朋友吹下水。檔主都算友善，但千祈唔好用商業城 style去買野，在地人都無人講價既。亦唔好無心買又搞搞鎮玩試食，仲有呢度多數收現金。 行過魚檔唔會太大腥味亦無濕立立，可能近大西洋同直布羅陀海峽，魚獲好豐富，全部十分巨形。但無理帶買條魚返香港！所以買左好多無花果乾做手信，最平7歐一公斤，有D連杏仁一齊烤過都試左少少。除左買手信，仲可以買D甜點生果返酒店食。 另外再有一個星期日市集，不過逗留日子對不上，如果咁啱星期日係度可以去行下。

Faro雖然地方細細，但好多英國或歐洲遊客鍾意去，因為有海濱有景點食海鮮平靚正。但地方太細，冇乜連鎖品牌酒店覺得有作為，所以想要住市中心的話只有一間Best Western Hotel Dom Bernardo 。另外一間 Ibis其實係 Algarve。 無錯呢度酒店係貴既，同埋你會覺得硬件完全跟唔上價錢。所以同 Sintra一樣又係早D要訂。好彩有 Trip.com, 早早 book 左可取消房價，連早餐只係 900幾一晚，正常八月平日連早要千五六一晚。 間酒店住完全七八十年代款式，但乾淨舒適。最重要住員工真心熱情，接待我既Claudia幾乎分享哂Faro 最好，大家溝通得好開心。早餐餐廳既大娘一個人炒哂全場，英文唔好但盡心盡力。位置其實都幾中央，行去海邊同火車站都係十五分鐘內，行去market 同人骨教堂只需5分鐘左右。 房間寬敞，雖然雙床窄D但舒服。冷氣setting係怪怪地，房間係一樓但都 feel到安全。有雪櫃有水煲有浴缸，無拖鞋無牙刷。我幫襯左洗熨服務，因為真係好平，一條長裙一條褲一件恤衫只係 8.5 歐。

6歐一位可以想輕鬆自在遊古城，帶老友記一流，坐邊位都哂，記住搽sunscreen！碧瓦爾曼如埃爾花園(Jardim Manuel Bívar)觀光小火車總站出發，紅色車身紅色總站好易認。45分鐘旅程暢遊Faro名勝景點同會經下民居，可以落車不過冇乜人落。法羅觀光小火車運行於10:00-13:00以及15:00-18:00期間，每小時一班次，小火車從花園出發，穿越古老的城門，走進古老的小巷，以舊城教堂為旅程的結束點再返總站。