其實係有啲失望,同以前嘅感覺唔同。
講左讚先,一如既往櫃枱職員好nice。房內有普通台同apple tv,睇到悶可以連iphone玩。拖鞋非常舒服。有一個轉插提供。電動窗簾好正。風筒都幾好用,唔係啲垃圾要禁住先開得果啲。24小時健身房同洗衣房。
跟住就失望喇,因為以前住過,之前有一袋零食送,野飲有氣水有酒免費飲,依家乜都冇晒,得兩樽水,其實我唔知係得我冇定改左唔再送。冇左牙膏牙刷護理包,好似係比錢先有。最癲係洗手盆同沖涼開水係微暖水,我以為兩晚都要用室溫水沖涼,諗住打去櫃枱話換房,開左水15分鐘終於慢慢熱返,係有熱水嘅,但係應該好耐冇人用過加上低層要沖返係水管啲水出黎先有「新鮮嘅熱水」,咁樣真係麻麻。整體間房係細少少。入住最時兩部𨋢已經停左一部(寫住暫停使用),之後我落地拎完外賣唔知咩事停埋第二部,我心諗兩部停晒我坐條鐵返上去,連返lounge向職員求助都唔得,最後我同另外一個人等左幾分鐘部𨋢又開得返先上到房食野,我都唔知咁係咪叫壞左。