📍曼谷美食。回味無窮粉絲煲 Somsak Claypot Crab @Lat ya。

呢間Somsak Claypot Crab係搵下有咩正野食時，無意中響網上搵到，排行程時仍然十五十六考慮去唔去，第一係個站周邊無咩景點，最近係1.8km距離嘅Icon Siam，第二係食既野相對地單一，值唔值得去試一兩樣野? 但響曼谷未食過類似既野，加上貴精不貴多就決定去。 BTS Wongwian Yai Exit 3 跟住Google Map行，小路係人車兩用，所以要小心車，兩旁既店舖都收得7788，整條小路都係幾層高既民居為主，好靜～地鋪都充滿年代感既拉閘，有啲似以前爺爺米舖既感覺，一條路直行，會經過Somsak Claypot Crab 另一間分店，但要坐街無冷氣，所以我哋去Lat Ya分店。 行多陣就轉出大路Lat Ya Road，有啲澳門內港既感覺🙈，成條街得Somsak Claypot Crab 有人等位，好在有樓上，等一陣就有位，提一提，呢度環境街坊啲，對餐廳環境有要求就未必岩你，但簡陋得嚟係乾淨。 因為我哋晏去，無曬羔蟹(上網睇係勁多羔)，只剩大Size 肉蟹，見到門口啲蟹仲郁緊，一有單就即劏蟹，再加粉絲煮一煲上! Menu的確選擇唔多，叫左蟹煲、蝦煲各一～肉蟹粉絲煲有一隻蟹🦀，大Size THB 750，大蝦粉絲煲就有4隻大蝦🦐，只係THB 290！ 上檯熱辣辣好香，自己再兜亂下，已經流晒口水。蝦同蟹都係好新鮮，完全唔霉，厚肉彈牙，見到煲底有莞茜、黑胡椒粒、蔥同豬肥膏，但佢個莞茜唔算好大味，我唔食莞茜都接受到。 而最正！最正係個粉絲，吸收曬啲精華，我哋覺得大蝦煲個粉絲係好食過肉蟹煲既粉絲，實在太好食，忍唔住再叫多個大蝦粉絲煲，其實可以叫Extra粉絲，但我哋遲左講加唔切🥲，再叫既蝦煲都係好好味，連汽水埋單THB 1370即係三舊水有找～我下次再嚟曼谷一定會再嚟！ Grab or 10mins walk from BTS Wongwian Yai Exit 3 步行 10mins Open Hours: 15:00 - 21:30, Monday Off #泰國 #曼谷 #2022千日後重遊曼谷 #曼谷美食 #wongwianyai #somsakclaypotcrab #海鮮控 #粉絲煲 #泰國旅行2022