九洲深度自駕遊11日（連行程、旅費）

香港終於開關，同男朋友拍咁耐拖都未出走過，難得出走，今次決定自駕遊去九洲！ 好好彩今次係係香港快運買到快閃機票，一人加埋行李來回只係1700蚊❤️‍🔥。我地簡左日本嘅Tabirai租日產Nissan做我地嘅戰車，因為出發前行程有變，遲左租車，7日連埋過路費係4000（已包NOC免責保險、ETC)。本身出發前兩星期Book 9日唔計過路都係2800炸🥹） 難得倆小口第一次旅行，我地又打算到大分玩（溫泉之都），就book左間係黑川溫泉附近嘅御宿野之花（2600一泊兩食，算貴但係係黑川唯一一間有房間溫泉嘅酒店，野食超好食！）係博多就住普通酒店，大概260蚊晚，總共住左6日；熊本較少酒店，就簡左BNB(極度推薦去日本住BNB，夜晚燒肉食一流）大概550一晚，住左4日）長崎都簡左BNB,大約350晚，冇車去會較唔方便。 行程： Day1 下午到福岡，返到酒店都已經7點左右，就是旦食左間拉麵，大約45蚊港紙。宵夜去左當地超市買Sashimi食，比較晚買，一盒魚生先330yen,18蚊港紙炸😍 （洗費60） Day2 男朋友仲未黎到福岡，自己就去左行天神地下街、博多，午餐晚餐都係食拉麵😋是日洗費唔過150蚊（夜晚又買宵夜、幫家人買野） Day3 瞓到晏一晏，行左去中洲商店街食百年鰻魚飯，盛為120港紙，但唔覺特別好味就唔推介。食完去左隔離嘅櫛田神社睇下，然後去左大濠公園。大濠公園環境清靜，唔少當地人都係到散步。有時間黎呢到行下都好好嫁！有幾可見有鴨同白露會停係到捕魚、飲水！ Day4 男朋友終於到福岡，一落機就拎車去大分嘅別府溫泉😍偏遠，但都值得去因為冇咩地方會有咁多溫泉係曬到，而且都好多足湯比你浸。去完就去溫泉酒店happy （除左過路費，係七仔買左45蚊野就冇用到錢） Day 5 呢日落雨，退房後就去左黑川溫泉街行下，然後再去高千穗。高千穗好靚，特別有獨木舟划，好特別嘅體驗，落雨玩都好開心。我地仲食左流水麵，意外地唔錯，好食又好玩。夜晚我地去左買宵夜食，買左大約50蚊左右，然後就早早瞓了。 （流水麵大約60蚊港紙一人，租船用左好似大約200蚊兩人左右，加埋宵夜同黑川溫泉嘅小食，大約用左200蚊左右一人） Day6 今日原本去睇火山嫁，但仍然大雨，結果一早出發都要原途折返，返旅館。瞓醒就去左由布院啦！去到由布院，我地就醫肚覺，食左好出名嘅まぶし心，食赤牛同鰻魚。食完就行下，食下當地小食，0伏。男朋友話冇去過機鋪玩，就帶佢去左Round1仲打左棒球。 （兩個飯加埋300蚊，小食大約食左120蚊，機鋪玩左60蚊左右，總共250蚊一人） Day7 終於有太陽，一早出發去阿蘇火山。可惜當日風向唔穩，我地玩唔到熱汽球，就係附近睇下。去左草千里騎馬，騎完1130左右就book玩直升機睇火山（如果想坐一定要朝早book,當日1130拎而鋪頭開11點，拎到飛嘅號碼已排到下就4點9，但直升機收5點半）拎完飛就帶男朋友食當地嘅鄉土美食—白水乃藏，物超所值！然後食完去下附近嘅白川水源再返阿蘇火山。阿蘇火山係世界唯一一座可以近距離接觸嘅活火山，我地係衝住佢黎九洲！玩到直升機真係超開心，景都超靚，個種震撼要親身體驗先明！當日火山好穩定，玩完我地就上火山睇火山。回程帶男朋友去左日本當地好受歡迎嘅workman買衫，晚上食左熊本拉麵再食馬肉，聽下busking ，仲比左錢點唱First love再去機鋪玩。 （白水乃藏燒肉300兩人，騎馬大約30蚊一人，馬肉食左350兩人，拉麵大約50蚊一人，是日洗費總共約300一人。買衫一人大約用左300蚊） Day8 呢日我地瞓醒就連人帶車坐船去長崎，船飛一早網到book左。一去到長崎就揸車去豪斯登堡。豪斯登堡仿效歐洲，好似荷蘭咁，係日本最大嘅遊樂場，環境都好靚。有機會都可以黎玩下佢地嘅歷奇冒險同VR。夜晚就食當地居酒屋，全部好好味😍同老闆講特登係香港黎，好好食，佢都好開心。走個陣仲見到地下啲溫泉煙係咁湧上黎，好得意啊 （船飛大約150一人，遊樂場門票250一人（經klook 買3點入園）居酒屋260兩人，洗費約430一人） Day9 呢日起身就返博多食Omakase,所有野都好好味好甜，仲食左人生物一次食嘅魚子醬🥰臨走同師傅影左張。然後去左太宰府，太宰府係祈求學業好地方，讀緊書嘅我，梗係去朝聖下，希望繼續GPA過3啦！然後我地夜晚食博多必食嘅華味鳥水炊雞，十分鮮甜，果然係蒙嘉慧都介紹嘅餐廳！食完行下就去左食屋台，氣氛好好，會有唔少食客同你傾計。佢地英文都唔差嫁！發音好好。傾得好開心！佢地對旅客好熱情，自己用日文同佢地閒聊幾句都好開心！ （Omakase我地食貴，食左一人約900蚊，水炊雞一人200,屋台337兩人, 一人洗費約1250） Day10 呢日我地book左餐廳食牛腸鍋，牛腸好甜，叫一人份都岩岩好，我地都叫左餃同叉燒但叉燒較鹹，可能係用黎比人配酒食用。1點就還車後就去左博多站買下手信，必買有明太子、明太子蝦餅同長崎福砂屋嘅蜂蜜蛋糕）夜晚我地就去左食拉麵（前一日屋台師傅介紹，但唔係豬骨拉麵）再行下屋台跟住去機鋪玩😂再食一雙同買左啲魚生返酒店食。 （牛腸鍋加其他小食人均80，手信大約買左200左右，兩個拉麵加埋大約85蚊左右，魚生加飲品買左80兩人，機鋪玩大約用左150兩人，一人約400蚊） Day11 一早係7仔買早餐啲野就去機場，入到閘口見到royce就係咁掃😛 （早餐兩人約60港紙再加前一日食唔曬嘅魚生，買手信大約買左400蚊） 洗費： 機票：1700（加埋行李（去加20，回加40）） 酒店：3430 食玩：3603（自己再買藥妝啲野加多1500左加） 車加過路：2000一人 總共：10，733一人（大約） 自己拎左8000蚊（車嘅費用係當日拎車先比）黎玩都夠用，Budget有限，想深度體驗日本人嘅生活，自駕，九洲真係好岩你地！#福岡 #熊本 #長崎 #九洲 #阿蘇火山 #日本自駕遊 #自駕遊