高質西班牙午餐

上次跟朋友嚟過銅鑼灣西班牙菜餐廳依晚餐，感覺都唔錯，所以今次同大少出銅鑼灣買書，行經附近就嚟舒舒服服歎個午餐。 餐廳佈置都有格調，整體感覺都好舒適，chill感非常，另外仲設有戶外座位添。 以ipad為餐牌即刻增添多一點時代感，而且佢嘅食物種類都唔少。最後我地就超豐富地每人叫左個set lunch，再加一份小食、一杯特飲同一份甜品。 其實我地嘅set係包餐飲嘅，咁我就叫左杯凍檸茶，不過大少見到隔離杯特飲好靚又話想飲，所以就叫左杯紅莓荔枝為主嘅 Dance Tonight，味道唔錯得嚟真係好啱打卡呀！ 小食就叫左份 北海道帶子刺身 ，北海道帶子刺身大粒又厚，再配埋日式麻油柚子醋，味道都真係份外鮮甜。再加埋魚子醬、魚籽同柚子粒，口感變得豐富，而且鹹香中帶點清新，絕對係令人一食難忘嘅小食。 先嚟set lunch嘅龍蝦湯，入口Creamy而且勁香龍蝦味，我湯怪可以証明係高水準之作。 薑味橙香橡果西班牙黑毛豬鞍架，個豬鞍架真心覺得超正，肉質嫩滑又夠腍，食落仲好juicy。而且食落仲有陣陣嘅橙香味，令到成件事都好fresh。千其唔好漏左個薯蓉，因為真係好Creamy夠滑身。 炭燒澳洲羊架伴甜椒蛋黃醬，單睇賣相都已經非常吸睛，食落都仲有驚喜。羊架燒得剛剛好，肉質軟嫩而且超多汁，帶丁丁羊騷香味，再配埋個蛋黃醬一齊食，可以係話夾到冇朋友， 最後就以 巴斯克芝士蛋糕配雪糕 作總結，巴斯克芝士蛋糕質感濕潤幼滑，再配以流心狀態，真係好味到停唔到口。而配上嘅雪糕亦都係另一亮點，豐富嘅質感加上超重奶香味，大愛呀 📍銅鑼灣駱克道487-489號駱克駅3樓