澳門氹仔官也街 - 掃街搵食好去處😋

事隔8年終於再去澳門！ 慶幸地係復活節長假期前到訪，成功避開人潮😆 . 今次主要留左係氹仔個邊玩，官也街都掃左兩次街！ 除左掃街，官也街附近有條小巷有好多靚壁畫，七彩繽紛嘅屋仔超啱打卡，大家唔好錯過！ . 我今次都試左大部分係官也街同周邊嘅人氣美食店，有啲真係好食，有啲就一般般，有興趣知多啲可以睇下面嘅食評🤣 . 🍴安德魯餅店 好食，好香蛋味！值得排隊，同條隊郁得好快，唔怕等好耐！ 🍴老Day牛雜 & 榮記牛雜 老Day: 咖哩辣汁好出色，不過都真係幾辣🥵有得揀要咩部位，我就叫左牛筋、牛肚同牛腸，附送蘿蔔。牛筋超軟腍同入味，好好食，必叫！蘿蔔食落無渣，都係好入味！ 榮記: 今次叫左少辣，五香味比咖哩味濃，我個人比較鍾意老Day嘅辣汁。我叫左招牌牛三寶，有牛筋、牛腩、牛舌、牛腸、牛肚、牛隔膜，當中最好食係牛腩、牛舌、牛腸。牛筋同蘿蔔相比老Day較硬同唔入味。 如果食得辣，只選一間，我會推薦老Day多啲😀 🍴打鐵豆花 超可愛既雞蛋仔外型，味道有啲似無饀嘅車輪餅，唔太特別，亦都未到好好食，但拎住佢食去等其他要排隊既食店都幾適合😂 🍴旺記咖啡 樽仔奶茶十分一般，感覺係香港飲到更多好飲啲嘅奶茶。豬扒包既豬扒幾好食但有骨，食落有少少麻煩，個包都唔夠脆身，有啲美中不足。 🍴檸檬車露 (官也街附近有分店) 我覺得係有驚喜嘅Gelato，外貌都幾啱打卡！我食左三個味，招牌檸檬車露、黑芒果同彩虹味（棉花糖味），檸檬車露大推！超清新！其餘兩個就一般般。 🍴薈真集（官也街附近有分店） 我飲左最出名嘅澳門奶茶，姐係木糠布甸奶茶，我唔知到底係因為我叫左小糖定係分店水準有落差，我理解唔到呢杯野係點好飲，由味道至口感都不是我杯茶😅 🍴澤賢記（官也街附近有分店） 我叫左招牌葡撻蛋球仔(雞蛋仔)，只可以講唔係我鍾意既口感。首先，所謂葡撻味就係雞蛋仔會有甜雞蛋饀料，饀料偏甜，食多幾粒有啲膩，而且無左個餅皮，唔太有葡撻感覺。另外，雞蛋仔外皮處於唔脆唔腍嘅狀態，通常常見外皮脆嘅雞蛋仔少啲饀，食個脆嘅口感。外表腍嘅就會多啲饀，有少少蛋糕既口感，但呢個係界乎中間尷尬位，會唔會係我個底雞蛋仔嘅問題？可能係個別情況，但我為左呢底雞蛋仔等左超過半個鐘就有少少失望。 希望大家食得開心🥳 #澳門 #澳門美食 #澳門景點