韓國特色傳統市場［廣藏市場］

韓國有好多唔同既傳統市場，我推介其中一個叫做~廣藏市場。呢個傳統市場入面包羅萬有，岩曬想試唔同韓國風味食物既大家。入面有熟食區，食生牛肉/生八爪魚既食店街，賣棉被既街，賣涼拌醃製品既街，仲有賣手信既店舖等等。不過呢個市場逢星期日啲舖都休息，所以要預番岩時間去喇。 去廣藏市場可以搭韓國地鐵係2號線-乙支路4街站或者1號線-鐘路5街站落車，步行幾分鐘，非常方便。 不過廣藏市場非常之大，如果行曬成個市場既話，真係要預3個鐘既時間。如果假期去既話會人山人海，所以建議大家可以避開假期去。通常我黎到廣藏市場，首先就會去熟食區醫肚先，一排排既攤檔賣各種唔同既食物，呢度最出名既有綠豆煎餅（食落唔會好油膩，口感類似薯餅），泡菜煎餅（比綠豆煎餅再薄身小小，食落唔會好厚麵粉），辣炒年糕（比出面既更粗身更Q彈），甜米露（一般甜米露比較甜，但呢度唔會過甜），麻藥飯卷（細細卷，好香芝麻油既味），仲有其他布帳馬車可以食到既小食。除左呢啲傳統小店，亦有排隊名店Cafe Onion。 醫完肚之後，可以散散步，去睇下手信同棉被。今次我去左169號舖MIDO棉被，因為屋企人怕凍，簡左兩張毛毛厚棉被，老闆聲稱可以抵擋到0度既天氣，都只係港幣2百1幾蚊一張。另外再簡左一張四季被，摸落去係涼感同好滑既，港幣300蚊一張。買完被老闆會幫手抽真空，我用一個28吋喼都可以放得落三張被。老闆仲送咗幾支水畀我哋飲👍👍👍大家有時間不妨去體驗一下。 #韓國 #首爾 #廣藏市場 #棉被