適合新手的行山路線—千島湖

今日約左班朋友去行元朗千島湖。由朗屏西鐵站搭K66巴士，到大棠山路站落車，沿住大棠山道行，會經過燒烤場，繼續向前行，跟住指示牌上嘅大欖林道伯公坳段方向前行，會經過伯公廟、關帝廟，最後就會見到千島湖清景台指示牌，向上行就會到達千島湖清景台，可以由上而下俯瞰大欖湧水塘既景色，喺度慢慢打個卡，飲啖水再起行。可惜我地去果日大霧，啲相影出黎相對無咁好睇。 離開觀景台時我地就行左落掃管笏村小巴站，沿路會見到個小攤檔，佢賣既貨品都幾的色精緻，有天然珍珠/水晶製作嘅Diy首飾、小盆栽、手指琴、木雕公仔……價錢都幾合理，採用誠實錢箱方式比錢，Payme都收！ 我都唔執輸，買左幾件戰利品走，當做手信送比朋友。但果度網絡唔太順，未必用到Payme, 想買既話，我就建議帶定多d現金喇！ 再繼續前行會見到幾隻小黑羊，佢地好溫馴好乖，只係間唔時會搵頭互相撞下對方，大家可以盡情同佢地打卡，不過就唔建議掂佢地喇，因為肉眼可以見佢地身上都唔少寄生蟲。 到達掃管笏村小巴站小巴站之後坐43小巴就可以到達屯門市中心，轉乘巴士/地鐵都方便！ 整體黎講哩條路線難度偏低，多斜路，少梯級，我地行既時候都見到唔少小朋友/家庭。來回預3個鐘鬆d就搞得掂，趁天氣仲涼涼地大家都可以去下！ #親子好去處 #行山好去處 #千島湖清景台 #新手行山 #小黑羊 #大欖涌水塘