港島香格里拉酒店「港式• 港食」自助晚餐🍽

金鐘港島香格里拉酒店Cafe TOO「港式• 港食」自助晚餐報告🍽 Cafe TOO最近推出「港式• 港食」自助餐 🇭🇰 可以食到本地多間知名老字號，包括米芝蓮一星中菜廳夏宮、米芝蓮一星一樂燒鵝、安利魚蛋粉麵及檀島咖啡餅店嘅名物😊 🥂餐廳環境 餐廳裝潢優麗典雅，環境舒適寬倘，枱與枱之間有足夠空間，唔會坐得太迫✌🏻唔同料理嘅區域都劃分清晰，幾間老字號本土餐廳嘅攤檔有仿古招牌、復古花磚等裝飾，盡顯「老香港」情懷，甜品吧則有粉紅櫻花佈置，非常夢幻🥰 🍴自助餐食物 除咗有常見嘅刺身、壽司、Cold Cuts、海鮮之外，呢個「港式• 港食」自助晚餐嘅重點就係可以食到多間本地知名老字號嘅名物，鍾意試新嘢嘅我一次過試晒咁多間，好開心呀！ 1️⃣夏宮：蜜汁叉燒+玫瑰豉油雞 之前都有去過夏宮食飯，佢嘅叉燒都可以話係城中數一數二好食😋而自助餐有樣好，就係可以揀要肥要瘦定係要半肥瘦，各取所需。我鍾意食半肥瘦，肥瘦相間嘅夏宮叉燒口感鬆化，沾滿光亮嘅蜜汁，加埋誘人嘅焦脆燶邊，無得輸！玫瑰豉油雞都好嫩滑😍 2️⃣一樂：脆皮燒鵝+鵝油炒飯 成日聽一樂燒鵝嘅大名，不過一直都無機會試，估唔到竟然喺自助餐可以食到😋燒鵝一出爐，師傅就會即切即上，食嘅時候燒鵝皮仲係勁脆！燒鵝肉味道好濃，蘸上酸梅醬及秘製鵝汁，更有提味嘅效果！鵝油炒飯炒得粒粒分明，不過可能攤凍咗，鵝油香唔算明顯🤔 3️⃣安利魚蛋粉麵：豉油撈粗+魚蛋片頭+牛腩+雲吞+龍蝦汁魚蛋 已經屹立半世紀嘅粉麵店，不過位於筲箕灣太遠，所以我都係第一次食😅魚蛋魚片都係安利招牌，點咗一碗魚蛋片頭雲吞撈粗，魚蛋同片頭好彈牙，不過更加推薦龍蝦汁魚蛋，龍蝦汁鮮香濃郁，加埋大大粒又彈牙嘅魚蛋，我足足食咗6粒，哈哈🤣聽到有食客話佢哋嘅大地魚湯底都好甜，不過今次我就無試到啦😅 4️⃣檀島咖啡餅店：酥皮蛋撻 酥皮蛋撻新鮮出爐，熱辣辣咁食真係好正！酥皮有層次又油膩，蛋漿富蛋香又滑🤩可惜晚市無供應檀島招牌奶茶，得早餐同午餐先有😣 🔸海鮮 好多種類，有龍蝦、麵包蟹、蟹鉗、青口、大蝦等，推薦龍蝦同蟹鉗，龍蝦肉質爽彈多膏，蟹鉗啖啖肉🦀🦞🦐 🔹熱盤 除咗有以上聯乘嘅老字號之外，仲有多國料理，好似印度、西式、泰式等，泰式料理都真係由泰籍大廚主理，點心亦係即蒸！鐵板燒虎蝦及燒牛肉都睇落唔錯☺️ 另一個Cafe Too重點就係燉湯，燉湯出爐就會敲鐘，我去嗰晚有川貝海底椰豬展燉雞湯，無添加味精，鮮甜又潤肺，平時好少有湯水滋潤嘅我，完全飲湯當飲水😛 🔸甜品 款式超多，淨係蛋糕款式都睇到我眼花繚亂，我試咗芋頭椰汁西米露，雖然甜度稍高，但入面除咗芋頭粒之外，竟然有軟糯嘅丸子，煙靭控表示滿足！另外都有雪糕，有6款口味選擇🍦 🧃飲品： 包一杯餐飲，果汁/酒需另外加錢。另外亦有港式夏日透心涼嘅Mocktails及Cocktails，都好特別🍹 💓服務： 店員服務好主動細心，當我問檀島奶茶喺邊度攞嘅時候，店員好有耐性咁同我解釋晚市無供應，並主動介紹我試吓今次自助餐限定嘅香檳奶茶，又有主動提議幫我留起兩個新鮮出爐嘅檀島蛋撻。付款嘅時候又有主動提及信用咭優惠，好專業！ 💰 價錢： 🥢自助午餐： 供應時間：星期一至日及公眾假期 上午11時半至下午2時 價錢：星期一至五 $438/位；星期六 $528/位；星期日及公眾假期 $708/位 🥢自助晚餐： 供應時間：星期一至五、日及公眾假期 晚上6時半至10時；星期六及公衆假期前夕 頭輪 下午5時半至晚上7時半、次輪 晚上8時至10時 價錢：星期一至四 $698/位；星期五、日及公衆假期 $758/位；星期六及公衆假期前夕 頭輪 $758/位；次輪 $698/位 #酒店自助餐 #香港staycation酒店交流谷 #hyperair