假日親親大自然好去處@石澳一日遊

一有長假期，香港好多離島地方都會好多人，今個聖誕假，我哋揀咗去石澳，估佢唔到人流唔算多，天氣好好，可以親親大自然影吓相呼吸下新鮮空氣，遠離繁囂，好舒服啊！ 我哋由筲箕灣轉小巴入去，大個坐咗20分鐘左右，如果搭巴士嘅話呢就會耐少少大概35分鐘。因為我哋嗰日一到咗筲箕灣好快就見到有紅色小Van所以就揀咗小巴。 入到石澳落車，第一件事就係落石澳沙灘，望吓個海感受吓啲海風同和昫嘅陽光，呢樣唔太熱有少少風，成件事好超chill，好正 。 喺士多買咗兩支水，我哋就開始沿着石澳村出發，途中就會經過幾棟馬卡龍色系嘅小屋，呢度啲屋嘅牆上面色彩繽紛，有啲係糖果粉色系，有啲係有歐陸風格嘅，係石澳村嘅特色之一，吸引咗唔少遊客黎呢啲屋仔前面打卡影相。 沿着石澳村繼續行，唔使15分鐘左右就會到達情人橋，基本上都唔使特別搵㗎你，跟住人行就會好容易見到，呢個亦都係石澳地標之一。 情人橋曾經喺2018年嘅時候比颱風山竹整冧咗，喺2021年嘅四月重開，重開嘅情人橋，保持咗粉藍色嘅外型，佢嘅另一邊係連接着大頭洲，大頭洲一個連島沙洲，係退潮嘅時候，就會同石澳相連。 我哋留咗情人橋嗰度慢慢打卡影相，不時睇吓海浪，欣賞吓附近被海浪拍打而成嘅唔同岩石形狀，仲見到有人嚟影結婚相添。 大約去到日落左右，我哋就慢慢行返去石澳泳灘，趁未係好多人回程就搭返小巴落筲箕灣啦。  #香港好去處 #親子好去處 #石澳