［韓國新興打卡熱點］聖水洞介紹

“聖水洞”係近年新興既打卡熱點，由工業區搖身一變變成年輕人聚集既地方，有唔同裝修風格既Cafe林立，亦好多韓國潮流品牌進駐。其中最出名既莫過於Dior Seongsu，Nudake同埋Cafe Onion。 Dior Seongsu係期間限定店，由2022年營運至2024年，由聖水地鐵站既4號出口行幾分鐘就到達。佢既外型係致敬法國蒙田大道既Dior總店，岩曬暫時未去到法國咁遠，而又想一睹Dior總店外貌既你，打卡一流。入面有Cafe可以嘆杯咖啡，亦有得shopping，不過要入去就需要預約，如果有韓國電話號碼，可以下載Dior Seongsu個app進行預約。無既話都唔洗太灰心，可以去walk in碰下運氣。 Nudake係眼鏡品牌Gentle Monster旗下既藝術Coffee Shop，聖水店外既紅白特色牆係佢既招牌打卡位，由聖水站4號出口行7-8分鐘左右到達。入面既每一件甜點都可以用藝術品黎形容，最出名好食既甜品絕對係抹茶流心牛角包，黑色好似皇冠形狀既牛角包，中間包住流心既抹茶醬，味道一流！好睇又好食！不過聖水呢間分店係無眼鏡可以買，如果要順便買埋眼鏡既話，就要去番狎鷗亭果一間喇。 Cafe Onion聖水店係行工業風既路線，水泥磚牆，係聖水站2號出口行前小小就會見到，不過因為人氣店既關係，所以去到首先係要排隊🤣。入面既麵包種類非常多，放曬係張枱度任你簡，花多眼亂，咸既甜既都有，總有一款岩你，其中最出名既係雪山麵包，麵包既表面堆滿糖霜，堆到一座山咁，岩曬鍾意食甜既人士，再襯埋杯咖啡就岩岩好。 除左cafe之外，聖水洞仲有一間食馬鈴薯排骨湯既名店，不過任何時間都實在有太多人排隊。所以推介另一間食韓餐既食店，佢係正馬鈴薯排骨湯既對面，叫做“길동우동 성수점”。由聖水站4號出口行大概4分鐘就到達。一入到去右手邊會見到有部機可以點餐，有中文可以睇，用信用卡都可以支付費用。我地一行7人叫左兩款餃子，紫菜飯卷，拌飯，辣炒年糕，辣炒豬肉飯，炸魷魚同炸紫菜粉絲卷。餃子一如既往咁大隻，炒年糕唔會太辣，好軟好煙韌，炒豬肉飯較辣，但個醬汁係令人辣得黎又甜甜地，好想繼續食，兩款炸物食落一啲都唔油膩，個皮係好鬆脆，唔會炸到好老，好好食！ 食飽左就可以行下唔同既小店，再唔係可以行去首爾林同埋建國大學都得，當散步係唔錯既選擇。 #韓國旅行 #首爾 #首爾旅行 #首爾景點 #聖水洞 #dior期間限定店 #onion聖水 #nudake