觀塘海鮮串燒半自助餐😙

趕得切係禁堂食前試下呢間觀塘既半自助餐，佢半自助吧既野食都算多，最想試既原因係佢有即製串燒檔，有唔同既海鮮🤩 出面自助吧有啲前菜、冰鎮海鮮、串燒、甜品同飲品可以拎，冰鎮海鮮有凍蟹、皇冠螺、青口同凍海蝦，小編幾鍾意佢既蟹同螺，蟹肉唔會霉，螺肉爽口彈牙，有海水味🤗 另外有啲沙律菜同餐湯可以任拎，菜都幾新鮮，有個corner係有專人係度燒海鮮同串燒，海鮮有唔同款式，上面會鋪左啲蒜蓉，都食左成3轉，推介既有鮑魚、大蜆、元貝、牛丸、芝士腸同雞翼，呢度仲有沙嗲醬同麻辣醬可以點，岩哂鍾意食濃味啲既朋友仔😜 每人可以點一個主菜，嗌左紐西蘭烤羊西冷配香草醬同澳洲肉眼扒（8安士）配野菌汁，羊扒都幾大塊，叫左七成熟，一啲都唔膻，羊肉好軟淋，配埋香草醬食好夾，側邊仲有啲茄汁配菜，而肉眼扒肥瘦均勻，牛味香濃，冇筋唔韌，熟度都岩岩好😎 甜品櫃有多款糕點同蛋糕，有椰汁紅豆糕、馬豆糕、芝士蛋糕、綠茶蛋糕等等，味道都唔錯😍 價錢：$328 （另加一） ————————————————————————————— 滿分係🐷🐷🐷🐷🐷🐷🐷🐷🐷🐷 好味Level：8.5🐷 抵食Level: 8🐷 Give Me 5 地址:觀塘鴻圖道90號5樓 #冬遊記 #foodie