東京女子旅行💁🏻‍♀️銀座優質酒店🏨瘋狂購物必住

#日韓市區酒店 難得同閏蜜放低老公，到東京瘋狂購物🛍️係無搬運壯丁陪同，當然要搵間就腳嘅酒店，千挑萬選揀咗位於東京銀座的三井花園酒店銀座五丁目。首先講吓佢嘅價錢，佢嘅價位算係物超所值，房間面積算過得去，位置嚟講雖然係銀座嘅外圍，但係步行去銀座同築地都只係需要五至10分鐘嘅時間。我哋喺呢四日嘅行程入面除咗由機場去銀座搭過車之外，全程都係可以行路過去。銀座真係一個購物嘅好地方，由名牌，貴婦護膚品，到中會嘅衫褲鞋襪，甚至係主婦最愛嘅100 Yen店都一應俱全，所以住呢間酒店真係冇得輸。 講返間酒店，三井花園酒店真係對得住廣大網民對佢嘅評價，酒店大堂很有氣派，酒店房間都很寬敞清潔，放置我哋嘅戰利品都唔會覺得間房好擠迫😆房入面嘅雪櫃預先放咗兩樽水，好細心🥰酒店嘅床舖都非常舒服，只係比一般商務酒店貴少少，但整個配套高過一般商務酒店好幾個個層次🤭酒店仲設有大浴場，大家喺行街行到好攰嘅時候返嚟浸一浸，真係非常紓解到疲勞。另一個值得讚賞嘅地方係，佢嘅女士大浴場係要用房咭拍卡先入到，安全度很高👍🏻除此之外，酒店仲設有健身室，但我個人而言，呢幾日已經每日行20,000步😂所以冇入去試玩。 仲有一點，絕對要讚賞，就係酒店距離機場巴士站嘅位置非常近，大包細包進出成田機場真係好方便👍🏻順帶一提，如果想乘搭機場巴士去成田機場，記得要預先喺網上面購票，咁就可以保證一定有位啦😊  #境外遊 #東京酒店