🌟餐廳：桂花小幸

🌟餐廳：桂花小幸 📍地址：元朗廣場G樓003 & 005號舖 💰價位：$50～$100 ☎️ 電話：2123 9497 最近食得比較多西餐，係時候要食返一啲特色嘅菜式！台灣野就岩哂我地！ 今日就約埋朋友仔入元朗，試試呢間主打地道古早味既台灣菜「桂花小幸」，提供多款台式小吃及手搖飲品，夠晒多元化，嗱嗱聲去試一試先！ ——————————————————— 🔹鹽酥雞扒滷肉飯套餐 （配是日燉湯 +上湯浸時蔬 + 加配滷水蛋） 鹽酥雞扒大大塊夠晒香脆，調味料又夠豐富惹味，餐廳仲好細心咁預先切成一件件，方便進食！滷肉飯嘅肉燥滷香味濃，採用半肥瘦豬肉，咬落份外甘香！再額外加配埋台式滷水蛋，咁至夠滿足！套餐包括一個足料椰子燉雞湯，清甜又養生，加上配搭嘅上湯浸娃娃菜，夠晒豐富！ 🔹蕃茄雞翼花枝丸麵套餐 （加配滷水豆腐，涼拌貓耳朵 及 紫菜魚丸湯） 麵底採用台灣麵，份量十足得黎口感彈牙！湯底就揀左特濃蕃茄湯，微微酸香又清新，食落一啲都唔油膩！滷水雞翼用上足料嘅秘製滷水汁醃製，鹹香味十足，肉質緊致啖啖肉，好出色～當然唔少得搭配埋台式花枝丸，咁至夠地道風味！ 朋友仔仲另外加配滷水豆腐、涼拌貓耳朵及紫菜魚丸湯，超級滿足，特別推介涼拌貓耳朵，涼拌汁酸酸辣辣，食得開胃又過癮！ 🔹百香多多梳打 及 炭燒烏龍珍珠鮮奶茶 兩個套餐都可以加配自家調製台式手搖飲品，包括招牌珍珠奶茶、益力多梳打系列、手搖茶等等，多不勝數！ 百香多多梳打，酸酸甜甜，解渴一流，入邊仲加入口感彈牙嘅椰果粒粒，層次感十足！ 我就揀咗呢度既主打，炭燒烏龍珍珠鮮奶奶茶，黑糖珍珠粒香甜煙靭，搭配奶味香醇嘅炭燒烏龍奶茶，成個組合夠晒滿足！ ——————————————————— 👅整體小總結 「桂花小幸」提供多元化既地道又傳統既台式美食，特別推介各款台式麵食及飯類套餐，份量十足得來又可以加配各款特色台灣地道小食，性價比十足，值得一試！