中環來自京都人氣拉麵過江龍

又有日本過江龍嚟到香港開業當然第一時間要去探店。講嘅係呢間位於中環歷山大廈嘅日本京都人氣拉麵店GOGYO 五行，特色之處在於佢將日本拉麵藝術同居酒屋文化結合，除咗可以食唔同嘅特色拉麵，亦都有串燒同其他料理。最驚喜嘅係餐廳其實仲係一間酒吧，有供應各式各樣嘅酒精飲品，好似日本酒、紅白酒、gin、cocktail、whisky、燒酌等等。 濃厚龍蝦沾麵 ($238) 叫咗餐廳最近推出期間限定嘅龍蝦沾麵，賣相非常吸引，原條龍蝦尾加上喺石鍋入面沸騰緊嘅赤紅色湯底，簡直係豪華嘅享受。先講個湯底，每一啖都係濃郁嘅海老鮮香，加埋醇厚嘅豚骨湯，香濃鮮味。低溫長時間慢煮嘅龍蝦尾，本身已經吸收晒湯底嘅精華，肉質爽彈飽滿厚肉，點啲湯汁一啖咬落去簡直係大滿足！沾麵嘅麵底用咗比較粗身嘅麵條，可以掛到滿滿嘅香濃湯汁，麵條口感彈牙。沾麵除咗龍蝦，仲有叉燒、芝士脆餅、半熟玉子、紫甘藍泡菜同水菜等配料，非常豐富。其中嘅芝士脆餅非常特別，脆卜卜有好香濃芝士味之餘，中間係中空嘅，可以裝啲湯汁一齊食。食沾麵嘅時候仲可以將海老味噌同巴馬臣芝士碎加入湯底度，令鮮味瞬間level up，別有一番風味。食完沾麵，個湯都唔洗浪費，事關個沾麵其實係兩食，只要將剩返嘅湯汁同跟沾麵個芫荽飯撈埋，就可以做到好似意大利飯咁嘅效果，鮮香湯汁加上芫荽嘅香氣同少少巴馬臣芝士碎，同白飯超夾。 特上海鮮丼定食 $238 午市時段餐廳有lunch menu，朋友就叫咗個海鮮丼set，用料都算高質豐富，有三文魚子、油甘魚、拖羅、三文魚、牡丹蝦、帶子同海膽。魚生新鮮而且份量十足，海膽大大羹口感幼滑creamy，帶子水嫩豐盈，牡丹蝦爽彈鮮甜。 豬腩肉天婦羅 $38 & 生菜明太子卷 $42 另外我哋仲叫咗兩串串燒食，款式好特別，係坊間少見。其中一款係豬腩肉天婦羅串，半肥瘦嘅豬腩肉做成天婦羅，將肉汁同豬油脂通通鎖住，一啖咬落去先係食到香脆炸皮，之後香濃肉汁就爆出嚟，再加埋軟嫩豬肉，好食。另一款用豬肉薄片捲住爽脆生菜，中間夾住辣味明太子，3重口感非常豐富，辣辣哋好惹味。 跟餐仲有杯飲品可以揀咖啡冷泡桂花烏龍茶、熱梔子花綠茶或者薑味汽水添。 。 。 @GOGYOHK GOGYO五行 (中環) 中環遮打道16-20號歷山大廈地庫1樓B02號舖 #hkfoodie#foodie #親子好去處 #本地遊 #香港好去處 #炎夏好去處 #夏日搵食推介 #香港美食 #駐站作家 #travel #hkfoodblogger