親子行山路線推介：小長城 #長洲 #睇奇石 #爬石 #睇風景 平時大家去長洲多數會做咩啊？應該點都會食大魚旦同埋芒果糯米糍，仲會行吓張保仔洞～ 我哋前幾日去咗長洲另一條行山路線：小長城～ 呢條路線真係幾好行，而且睇到好靚嘅風景，同埋奇形怪狀嘅石頭！ 搭船去到長洲之後，轉右行入昇昌里，去到大新後街再轉右，幾步就轉左長洲山頂道，一路行行行行行直至你見到一座好多青蛙裝飾嘅建築物同埋關公忠義亭，觀音灣路就係你左手邊，轉入去繼續行，幾分鐘之後會見到運動場，之後見到觀海亭就差唔多到小長城起點啦～ （講到好似好遠好複雜咁，其實開住個Google Map，好容易就去到觀音灣路😁） 沿着觀音灣路行，不過觀音古廟，冇幾遠就會見到去小長城嘅指示牌。一開始係向上行石級，左邊望到觀音灣、動漫嘅美景。我哋去行嗰日天氣好好，萬里無雲，一片藍天綠水，睇到都覺得心曠神怡😊 小長城有指示牌講解邊個位置有乜奇石，有啲石像真度都幾高，有啲就需要多啲想像力喇～ 我哋先去睇叮噹石、花瓶石同埋金鷹石，呢個我哋覺得唔係好似😆 叮噹石可以沿繩前往，不過我哋就冇去，去咗旁邊嘅花瓶石；花瓶石中間有一條罅隙，可以行入去睇吓，有少少探險嘅感覺🤓 行返上主路，抬頭可以望到大象石。再向前行，見到民政事務署嘅石碑，就轉落去睇女人頭石，我哋覺得呢舊石像真度最高🤩 最後睇埋玉璽石就完成，沿原路返去長洲大街食嘢醫肚😋 小長城一路都係大石鋪成嘅路，旁邊有欄杆，大人小朋友都行得好輕鬆👍🏻 以Natalie嘅腳程計，連埋打卡影相兩個鐘左右就完成✅ 不過就推唔到BB車🙅🏻‍♀️🙅🏻‍♀️🙅🏻‍♀️ #familytravel#hiking#naturalwonders