香港探店 燚（大埔）

餐廳喺大埔美豐花園，門面係黑色大木門配金色字牌匾，有日式風格嘅高級感。裡面裝潢都係以黑色為主，席前座位上面有個魚缸，散發出紫色燈光，有少少夢幻感覺。 我哋叫咗$588/$788厨師發辦套餐各一，再叫兩杯梅酒。 夏日炎炎，先食個【沙律】cool down就啱晒，菠蘿、番茄、青木瓜、龍珠果，配黑醋汁同柚子汁。沙律+夏天當造嘅梅酒，酸酸甜甜嘅沁涼感覺，夠晒開胃。 【頭盤】魚子醬溫泉蛋，黑色魚子醬好有光澤，撈埋溫熱嘅溫泉蛋汁，魚子醬爆開嘅溢出鮮味同蛋香好夾。 【鐵板海鮮】係鮑魚同扇貝。鮑魚用蒜蓉調味，鮮爽中帶惹味；扇貝就淋上黑松露牛油汁，味道多層次。 食食吓突然間全場熄燈，原來係有食客生日，餐廳為佢準備咗生日花同紅酒雪梨甜品，全場仲拍手唱生日歌俾壽星女聽，好有氣氛～ 【鐵板肉類】我哋揀咗一客豬肉一客雞肉。雞肉係蒜香牛油燒嘅秋田雞，肉味濃郁肉質嫩滑，配日本家鄉東方汁，辣辣哋幾惹味；豬肉就配秘製菠蘿汁，食得出唔係現成菠蘿醬，似係用新鮮菠蘿磨成蓉，極之鮮甜，同豬肉嘅咸香好夾。 【炒飯】係蝦仁蛋炒飯，蝦大大隻可惜得一隻，味道亦稍為淡咗啲，不過飯香飯氣十足。 【湯】麵豉豆腐湯，師傅將豆腐切成菊花狀，菊花係日本國花，好貼題。 最後到【甜品】啦，紅酒雪梨解膩兼消暑一流，甜甜蜜蜜又唔會太heavy，正～ 燚 (大埔) 大埔翠樂街11號美豐花園地下10號舖 #foodie